بنديرة - عداد التاكسي

بتركب تاكسيات؟ يبقى البرنامج ده ليك...

اعرف حساب التاكسي الابيض اللى انت راكبه و استكشف صور الاماكن القريبة فى السكة.

بنديرة برنامج خفيف هدفه انه يعرفك حساب عداد التاكسي الابيض اللى انت راكبه فى مصر. هيعرفك مبلغ الاجرة التقريبى اللى المفروض عداد التاكسي يكون حاسبه لو ماكانش ملعوب فيه.

البرنامج مظبوط على تعريفة التاكسي الأبيض فى القاهرة الكبرى اللى هى فتح العداد بيكون 3 جنيه (شاملة اول كم و 5 دقائق انتظار)، و بعد كدة بيعد 140 قرش كل كيلومتر و 25 قرش كل دقيقة إنتظار.

بيشتغل ازاى؟

البرنامج فكرته سهلة جدا.. اول ما تركب التاكسي تشغل البرنامج و هو هيلقط اشارة ال GPS عشان يعرف سرعتك و على اساسها هيعرف الطريق واقف ولا ماشى و هيفضل يجمع زمن الانتظار و المسافة اللى التاكسي مشيها و على اساسهم هيقوللك البنديرة كام لحد اللحظة ديه.

البرنامج صغير و خفيف جدا و ممكن تسيبه فى الخلفية و تكمل شغلك على الموبايل عادى و تبقى تشوف حسابك و تقفله بعد ما تقف و كمان ممكن تسيبه مفتوح و هو هيسليك و هيطلعلك صور الاماكن القريبة من الطريق اللى انت ماشى فيه لو حابب.

تنويه: طريقة حساب بنديرة التاكسي تعتمد بشكل اساسي على دقة حساب السرعة و المرتبطة بشكل اساسي بامكانيات المحمول و شريحة الGPS و قوة الاشارة المستقبلة، و التي تتاثر سلبا بالمباني المرتفعة و الظروف الجوية السيئة.