Tavba kitobi - Imom G'azzoliy

Abu Homid G‘azzoliy Ihyou ulumid-din

TAVBA KITOBI

Tarjimon va lug‘at tuzuvchi filologiya fanlari nomzodi

Rashid Zohid

"Movarounnahr" 2003

Ushbu kitob ulug‘ imom, “Hujjatul-Islom” Muhammad ibn Muhammad ibn Ahmad Abu Homid At Tusiy Al-G‘azzoliyning Bayrutda nashr qilingan IV jildlik “Ihyou ulumid-din” (“Din ilmlarini jonlantirish”) asaridan tanlandi.

Kitobda tavba amali bilan bog‘liq barcha holat-xususiyatlar Qur’on, hadis va solih salaflarimizning so'zlari asosida batafsil yoritilgan.

“Tavba kitobi”dan Islom tarixi, iymon asoslari va taqvo masalalariga qiziqqan keng kitobxonlar ommasi foydalanishlari mumkin.

Jamiki maxluqoti ichra insonni mukarram etib yaratgan, insonlar ichida bizni musulmonlar jumlasidan qilgan Alloh taologa hamdlar bo‘lsin!

Insonni jaholatdan ma’rifatg‘a. zulmdan adolatga, halokatdan iajotga boshlagan hidoyat elchisi Payg‘ambarimiz Muhammad alayhissalomga durud va salovotlar aytamiz.

"Odam farzandlarining barchasi ko‘p xato qilguvchidir. Xato qilguvchilarning yaxshisi tavba qiluvchilaridir",- deb marhamat qiladi so‘zlaguvchilarining eng rost-go‘yi Rasululloh sallAllohu alayhi vasallam.