Qarabağı tanı - Şuşa

Şuşa rayonu - Azərbaycan Respublikasında inzibati rayon olaraq Kiçik Qafqazın Qarabağ silsiləsi ərazisində yerləşir. Sahəsi 310 km2, əhalisi 33372 nəfərdir (01.01.2017). Mərkəzi Şuşa şəhəridir. Rayon 8 may 1992-ci il tarixindən erməni işğalı altındadır.

Rayona Şuşa şəhəri, Turşsu qəsəbəsi və Malıbəyli, Yuxarı Quşçular, Aşağı Quşçular, Xəlfəli, Armudlu, Dükanlar, Həsənabad, Qarabulaq, Ağbulaq, Zamanpəyəsi, Şuşulu, Mirzələr, Qaybalı, Laçınlar, Şırlan, Çaykənd, Paşalar, Məmişlər, Xanalı, İmamqulular, Cəmillər, Səfixanlar, Xanlıqpəyə, Allahqulular, Həsənqulular, Böyük Qaladərəsi, Kiçik Qaladərəsi, Göytala, Onverest, Zarıslı, Nəbilər, Sarıbaba, Daşaltı, Nağılar, Xudaverdilər, İmanlar, Turabxan kəndləri daxildir.

Səthi dağlıqdır. Ən yüksək zirvəsi Böyük Kirs dağıdır (2725 m).

İşğaladək rayonda İttifaq əhəmiyyətli sanatoriya-kurort kompleksi fəaliyyət göstərib. Rayonun iqtisadiyyatında heyvandarlıq əsas yer tutub. Rayonda 50-yə yaxın ümumtəhsil, ali və məktəbdənkənar təhsil ocağı, 4 istehsalat birliyi, 60-a yaxın sosial-mədəni və məişət, 20 səhiyyə obyekti fəaliyyət göstərib. Şuşada hər birinin öz hamamı, məscidi və bulağı olan 17 tarixi məhəllə var idi.

İşğaldan əvvəl rayonda dövlət tərəfindən qorunan 300 tarixi abidə, 550 qədim yaşayış binası, 870 m uzunluğunda bərpa olunmuş qala divarları mövcud olub.