Matyoqub Qo'shjonov - Mohiyat

O'zbek sovet adabiyotining bugungi taraqqiyot daraja-sini belgilaydigan qator omillar mavjuddir. Bu omillardan biri o‘zbek xalqining qadimiy va navqiron adabiy merosidir. Ma'lumki, o‘zbek adabiyotining mashhur obidalari qariyb ming yillik tarixga ega. Bu davr ichida o‘zbek xalqi dunyo madaniyati xazinasiga qator san'atkor, yozuvchi va shoirlarni berdi. Bu san'atkorlar ijodida mehnatkash xalq orzu-istaklari, dard va alamlari, hayot darajasi aks etdi. Xususan, ular ichida ulug‘ gumanist, mutafakkir shoir Alisher Navoiy nomi faxrli o‘rin egallaydi. Yana shu narsa ma'lumki, o‘zbek xalqining madaniy merosi qay darajada boy bo‘lmasin, o‘z vaqtida Yev- ropa mamlakatlarijuda ko‘plab nusxalarda kitob chop qilish ishlari yo‘lga qo‘yilmaganligidan, adabiy asarlar mehnatkash xalq orasida juda kam tarqalgan. Adabiy merosni o‘rganish va uni xalq ommasi orasiga tarqatish, asosan, Oktyabr sosialistik revolyusiyasidan keyin boshlandi. Shu kunlarda o‘zbek shoir va yozuvchilarining ijodlari har xil shaklda, ba'zan alohida to‘plamlar, ba'zan tanlangan asarlar ba'zan esa to‘la to‘plamlar shaklida ham o‘zbek tilida, ham rus tilida nashr qilinib turibdi. Alisher Navoiyning alohida asarlarining nashridan tashqari rus tilida o‘n tomligi, o‘zbek tilida o‘n besh tomligi chop qilindi. Hozir esa bu ulug‘ gumanist shoirning yigirma tomdan iborat to‘la asarlar to‘plami nashrga tayyorlanyapti.